Oh quantu è bellu stu paisi mio
Arroccatu com’è su na collina!
Pe nudda cosa io lu cangiarìa
Sulu quantu respiri d’aria fina.
Alle falde ubertose di “Contessa”,
Propri de frunti nc’è monte “Cozzale”
A mezzanotte s’erge il “Reventino”
E’ na bellezza chi non c’è l’eguale.
Guardandu ancora puocu cchiù luntanu.
Viditi li muntagni de Pulia,
Troneggia nta lu mienzu monte “Ardica”
E’ na veduta chi mai stancarìa.
E chi vi dicu pua de la marina….
Basta na caminata a S.Elia
Mu vidi nu panorama chi ti ncanta
De Capu Suveru finu a Parghelia.
E tutta la bellezza de lu golfu,
De S.Eufemia tutta la chianura
Si domina, e non finisce mai
Stu prodigiu chi fice la natura!…
Si vide puru l’Etna chi fuma
Lipari, Stromboli, Vulcanu
Chiddi jiornati chi non nc’è foschia
Pare ca li pigghjiamu cu na manu!…
