Pubblichiamo la poesia di Pino Sgromo 

 

N’ta sa prajia apparata

de lu viarnu e de lu viantu

tuttu Curnga a matinata

scindia a mara assai cuntiantu.

Cu lu sula de u matinu

scura n’umbra s’allongava

de na cruci chi dicianu

ca lu postu prenotava.

Si levava tanti vuci

chi lu viantu pua m’biscava

a lu cantu tantu duci

de u martiaddu chi pistava.

E n’cignavi a scarricara

tavuluni e cannizzuali

si mentianu a hatigara

e li randi e li higghjiuali.

Nc’è lu mastru cu u liviaddu

cu è appricatu a lu scavara

cu è n’garbatu cu u martiaddu

ava tavuli e n’chiovara.

N’ta nu lampu de colori

cuamu passa la risacca

terminati su i lavori

ed è pronta la barracca.

Esta pronta la hrischera

già li letta su acconzati

e li commidi a mugghjiera

ava tutti preparati.

Cu i barracchi preparati

de sta gente tantu stanca

hinarmente era estati

senza nente mu ni manca.

L’aria muta da matina

n’ta lu cora si posava

cuamu u sula supa a rina

quandu u juarnu ni portava.

Ogni jiuarnu a matinata

si levava u piscautri

cu la barca carricata

jia mu pisca tri quattr’uri.

Pua chiù tardu li pisciari

quasi quasi pe dispiattu

cu l’alici e i calamari

ti jettavanu e n’to liattu.

E Nicola jia cantandu

lu sentivi de luntanu

rroba bella sta arrivandu

m’bicinati chianu chianu.

Li cotrari arrusicati

si m’bolavanu n’ta mara

e na vota pua vagnati

no bbolianu chiù tornara.

De n’ta l’acqua pua nescianu

cu li mani ormai arrapati

a barracca si n’da jianu

tutti quanti chiù n’camati.

E mangiavi a panza china

ma la hami no passava

jivi allora dda a vicina

e na tavula t’amprava,

de patati e malangiani

o de surici de mara

cu chidd’uagghjiu n’ta li mani

n’da mangiavi na coddara.

Pua si l’umbra da hrischera

era poca e no bastava

la pineta sai ca nc’era

duva ognunu s’arripava,

pe la strata principali

de nt’a l’arvuri sentivi

chiddu cantu de cicali

e n’ta n’attimu dormivi.

A la hini de lu juarnu

quiatu u sula si curcava

ti dicia domana tuarnu

e n’ta mara si tuffava.

N’ta su scuru de la sira

ogni  lumi s’appicciava

e la luci cuamu u dira

de li puarti s’affacciava.

L’uacchi suli si chiudianu

e la vuci de lu mara

cu li stelli chi cadianu

ni hacianu addormentara.

E lu viantu chi passava

de nu muarzu e cannizzola

tuttu quantu t’abbrazzava

quandu iari n’ta i linzola.

Siantu ancora chidd’adduru

de lu lignu e de lu mara

chiuda l’uacchi..ed è sicuru

no tu pua no ricordara